Afrikaans: Die ESO-fotoambassadeur Yuri Beletsky het hierdie foto in mid-Augustus 2010 by die ESO se Paranal-sterrewag in Chili bekom. 'n Sterrekundige werkgroep was besig om die sentrum van die Melkweg te bestudeer met behulp van die lasergidsster-gerief te Yepun, een van die vier eenheidsteleskope van die Baie Groot Teleskoop (BGT). Yepun se laserstraal oorkruis die suiderhemel om sodoende kunsmatige sterlig 90 kilometer bo die aarde in die mesosfeer te vorm. Die lasergidsster (LGS) is deel van die BGT se aanpassende optiese konfigurasie wat 'n verwysingspunt skep vir korreksie van atmosferiese steuringseffekte op beelde. Die kleur van die laser is gekalibreer om energie oor te dra na 'n laag natriumatome wat in een van die boonste lae van die atmosfeer geleë is, en vermoedelik uit die reste van meteore bestaan. Die kenmerkende kleur van natriumstraatlampe kan ook aan die laser herken word. Die atome wat deur die laser opgewek word begin te gloei, sodat 'n helder ligpunt gevorm word wat dien as 'n kunsmatige verwysingster vir die aanpassingsoptiek. Sodoende kan sterrekundiges duideliker waarnemings maak, byvoorbeeld hier waar die sentrum van die Melkweg onder die loep is. Navorsers kan die galaktiese middelpunt nou beter moniteer, 'n gebied waar 'n supermassiewe swartkolk gas en stof akkumuleer en sy gravitasieveld werp oor die naaswentelende sterre. Die beeld is verkry met 'n wyehoeklens wat 'n hoek van sowat 180 grade onderspan.